Simon Lynge: Qilanaaqaanga

Kalaallip erinarsortartup erinarsuusiortartullu Simon Lyngep amerikamiup erinarsortup koorborpalaartunik erinarsortartup Emmylou Harrisip nunaniassigiinngitsuni qaammatip ataatsip ingerlanera tusarnaartitseqattaarnissaanut kissassaalluni appisimaartarnissaa oqaluttuareqqammerparput. Inuttaa qilanaaqaaq.
Allattoq Mads Lynge
maajip 13-at 2011 16:03

Tusarnaartitsisarnissamut Simon Lynge qilanaartorujussuuvoq:

- Pikkunassaqaaq, ataqqinaataasorujussuullunilu. Nuanneqaaq, tusarnaartitsinissamullu qilanaaqaanga. Inuppassuarnummi tusarnaartitsisassaagut, Simon Lynge oqarpoq.

Erinaq "Full speed", sukkalisaarnertut immaqa nutserneqarsinnaasoq ilaatigut appittarsinnaavaa. Nunallu tikitassat illoqarfiillu tusarnaartitsiffiusussat tamarmik angumerineqassappata, taava Emmylou Harris nipilersortartunilu qaammatip tulliuttup ingerlanerani ulapittariaqassapput.

Tusarnaartitsinerit DR-ip Københavnimi tusarnaartitsisarfiani maajip 23-ani aallartissapput. Kingorna taava Stockholmiliassapput Göteborgiliassallutillu. Taamaalereerpat Tuluit Nunaannukassapput, Skotlandimilu aamma tusarnaartitsissallutik. Tassa London, Manchester aamma Edinburgh tusarnaartitsiffiussagamik.

Belgia, Holland aamma Tyskland tikinneqassapputtaaq, taamaalereeerpat Tuluit Nunaannut utissapput, nunarsuarmi nipilersornermik festivalit annersaanni Glastonbury Festivalimi juunip naajartulernerani aamma tusarnaartitsisussaagamik.

Tassanilu tusarnaartitsinissamut Simon Lynge aamma qilanaarpoq.

- Tusarnaartitsinermut immaqa aatsaat taama angitigisumut inuutillunga peqataassaanga, qilaanaaqaangalu. Glastonburymi festivali tusaamasaasorujussuuvoq. Taamaammat qilanaarpunga, Simon Lynge oqarpoq, festivalimullu billetsit 180.000-it akunnerit sisamat ingerlaneranni tuniniarneqapallassimanerat oqaluttuaralugu.

Emmylou Harrisip tusartitsinissaanut kissassaalluni Simon Lyngep tusarnaartitsisarnissai akunnerup affaanik 45 minutsillu tikillugit sivisutigisarsinnaassapput, tassa erinnat arfinillit qrfineq-pingasulluunniit appittassagamigit.

Nuuteeqamik Tuluit Nunaanni maanna saqqummersitsileruttorpoq, CD-millu aamma saqqummersitsinissani unnersiutigalugu.

- Erinniarpassuaateqarpunga. Immaqa 60-it aamma 70-it akornanniipput, immiussinissarlu isumalluarfigaara. Londonimi ippassaq tusarnaartitsivunga, kingusinnerulaartukkullu tassa Emmylou Harris tusarnaartitseqatigissallugu, naggasiilluni oqarpoq.

Simon Lynge amerikamiumik nuliaqarpoq, USA-milu illoqarfimmi Port Townsendimi najugaqarpoq, Londonomilu aamma najugaqartarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq