MUSIKVIDEO Simon Lynge: Asanninneq pitsaasumik inuuneqalernissamut tunngaviuvoq
Simon Lyngep erinarsortarnermigut meeqqat pisinnaatitaaffiisa ilisimaneqarnerulernissaat siunertaralugu suleqataaniartoq MIO-p 2015-imi decembarip qaammataani tamanut saqqummiuppaa .
Tamanna Simon Lyngep erinarsuusiaata nutaap, Corner stone, saqqummerneratigut maanna piviusunngorpoq.
- Erinarsuusiara nutaaq nuannaareqaara. Meeqqat toqqissisimanissamut illersorneqarnissamullu pisinnaatitaaffii pillugit, aamma asanninneq tunngavigalugu qanoq ililluta siunissaannik pilersitseqataasinnaanersugut pillugu oqaluttuarpoq, Simon Lynge saqqummersitsinerminut atatillugu taama oqarpoq.
Meeqqat Illersuisuata Aviâja Egede Lyngep tusagassiorfinnut nalunaaruteqarluni erinarsuut nutaaq usorsisimaarutigalugu oqaatigaa:
- Meeqqat takorluugaasa piviusunngortinnissaannut peqataassaagut, aamma pitsaasumik inuuneqarnissaannut tunngavik pilersissavarput – aamma qanorluunniit tunuliaqutaqaraluarunik, oqimaatsunillu atugaqarsimagaluarunilluunniit takorluugaasa piviusunngorsinnaanerat takutissavarput, Meeqqat Illersuisuat taama oqarpoq.
Naalagaaffiit Peqatigiit Meeqqat pillugit Isumaqatigiissutaat
Erinarsuut ”Corner stone” – taanna isumaqarpoq qitiusumik tunngavik – tassani eqqartorneqarput Naalagaaffiit Peqatigiit Meeqqat pillugit Isumaqatigiissutaanni pisinnaatitaaffiit allassimasut: pitsaasumik inuuneqarsinnaanermut pisinnaatitaaffik, ineriartornissamut pisinnaatitaaffik aamma illersorneqarnissamut pisinnaatitaaffik.
Musikvideo ataani isiginnaarsinnaavat:
