Simon Lynge amerikami nersornaasiuttakkamut innersuunneqarpoq
Piukkunneqartullu innersuunneqarnini nersualaarneqartutut tigulluarsimavaa.
- Nuannaarutigisorujussuuara. Ataqqinaatitut tiguara suliakka nuannarineqartarmata. Tamannami nuannertuaannarpoq, Simon Lynge oqarpoq.
Nipilersortartut allat sisamat tassunga aamma innersuunneqarput, nersornaasiuttakkamullu nipilersortartut 400-t kategorinut assigiinngitsunut 96-iusunut aamma innersuunneqarlutik.
AAMMA ATUARUK Simon Lynge MIO-p angalanera aallarnerlugu appisimaattoq
Simon Lynge toqqagaanissani pissanngatigaa piukkunneqarnerli kisimi aamma qiimmaallannartuusoq oqaatigaa.
- Suliamik annertuumi suliaqarnikuulluni inernera nuannarineqartoq nersorinninneruvoq annertooq. Innersuunneqartunullu naliliisussat nuannaartorisaraakka taamaammat ataqqinaatitut tiguara, Simon Lynge oqarpoq.
Toqqangaasut New Yorkimi marsip 31-ani suaarutigineqarnissaata tungaanut Simon Lynge nuuteeqqamut nutaamut maanna immiussileruttorpoq.
- Nuuteeralioqqillunga immiussisarfimmi Narcissus Studiomi Londonimiittumiippunga maanna. Nuanneqaaq, immiussisarfiup Johnny Caship guitaria pigaat, taannalu atorlugu appisimaaqqammerpunga. Torraqaaq.
AAMMA ATUARUK Simon Lynge: Inuit nanertisimarrapput
Ulapittunnguaqarporlu. Maannami erinnat tallimat immiutereersimagitik oqaatigaa.
- Ingerlarsorpugut. Nuuteerarlu saqqummertussaq tusartinnissaa qilanaaraara, Simon Lynge oqarpoq.
Nuuteeraq nutaaq septembarip arfineq-aappaani saqqummersinneqassaaq.
Simon Lyngep nuuteeraliaa 'The map of your life' danskit nersornaasiuttagaannut GAFFA-mut siorna aamma piukkunneqarpoq.
AAMMA ATUARUK Simon Lynge danskit nersornaasiuttagaannut innersuunneqartoq