Sillimmasiisarnissaq Atuisartut Siunnersuisoqatigiivisa isumaqatigaat

Inissiarsuarni ikuallattoqaraangat paasineqartarpoq eqqugaasut amerlanerpaartaat pigisaminnik sillimasiisimanngitsut. Sillimmasiinerup inigisamut akiliummut ilanngunneqartalernissaanik,

Maniitsumi inissiarsuit ilaanni najugalik ippassaq siunnersuuteqarpoq. Isumassarsiarlu tamanna Atuisartut siunnersuisoqatigiivini siulittaasup,

Nikolaj Ludvigsenip isumaqatigaa oqarluni, Karl Lyberthip siunnersuutimini taasaa, qaammammut akiliinermi ilanngullugu sillimmasiinermut akiliutip naafferaatsumik akilersorsinnaanera, isumaqarpunga sillimmasertarfinnut isumaqatiginninniutigineqarsinnaaguni, pitsaasumillu inerneqassaguni, pitsaalluinnassasoq aamma kajungerineqassasoq, kisianni taalaarlara, namminneq paasisitsiniaanerat annikippallaaqaaq. Atuisartut siunnersuisoqatigiivini oqallisiginikuuvarput, sillimmasiisarfiit aningaaseriviillu, nunatsinni innuttaasunut annertuumik sullissisut danskisuinnaq paasissutissaateqarnerat iluarinngikkipput, tamatumalu qanoq allatut ingerlanneqarsinnaanera oqaluuseriniarparput. Isumaqarpugut kalaallisut paasissutissat, taamaalillutalu tamakkuninnga paasisimasaqartuusugut, tamakkuninngalu soqutigisaqartuusugut, paasisitsiniaanngippallaaqigatta pisooqataavugut, Nikolaj Ludvigsen oqarpoq.

Taanna Atuisartut Siunnersuisoqatigiivisa februaarimi ataatsimiinnissaanni sillimasiisarnermik apeqqut eqqartorneqassasoq.