Sillimmasiisarneq ilitsoqqussarinngilarput, ilikkartariaqarluguli

Sillimmasiinerup atugaavallaannginnera Maniitsumeersup Karl Lyberthip oqallissaarutigaa.

Karl Lyberth ilaatigut oqarpoq, kalaallit sillimmasiinermik ilitsoqqutaqannginnerat sillimmasiisannginnerannut peqqutaasoq, taamaammallu politikerinut inunnullu tamanna oqallissaarutigaa.

- Sillimmasiineq nunatsinni ajoraluartumik suli ilikkarsimanngilarput, pingaartumik angerlarsimaffitsinni pigisatsinnik sillimmasiineq, pingaartumik immaqa pisortat inissiaataanni ineqartuusugut. Taamatut perorsarneqarluta alliartornikuunngilagut, sillimmasiineq pisariaqartoq paasitinneqarluta. Danmarki qiviarutsigu, angerlarsimaffiit tamarluinnangajaavimmik sillimmaseqqapput. Ikuallattoqartoq ukiuni kingullerni ajoraluartumik tusallattaartarparput, ikuallattoqarneratalu kingornatigut sanilii, ataani qulaanilu najugaqartut aamma eqqorneqartarput, neriuppunga inuit, aamma politikerit allat, eqqarsalissasut, piffissanngunnginnerluni sillimmasiinissap ilikkarnissaa.

Sillimmasiineq eqqarsaatigalugu ukiumut akiliutaasartoq 1200-1400 koruunit missaani akeqarpoq, inatsillu aqqutigalugu sillimmasiisoqarpat, qularinngilara akikinnerusinnaasoq. Soorlu oqarutta ukiumut 1.000 koruunimik akeqassasoq, qaammatinut aqqaneq-marlunnut agguarutsigu qaammammut 100 koruuni inussavaa, akiliullu taanna illumut/inissiamut akiliutip qaavanut ilineqaannartassaaq, qaammatillu tamaasa akilerneqartalerluni, Karl Lyberth oqarpoq.

Taassuma neriuutigaa oqallissaarutini iluatsissasoq, iluatsinngippalli Inatsisartut paasitinniartariaqassapput, allaffigineqassapput, namminerlu politikerit nalunngisani isumassarsiap ajunngitsuuneranik paasitinniarniarpai, allatullu ajornarpat inatsisit aqqutigalugit taamatut sillimmasiineq atuutilerumaartoq neriuutigaa.

Taassuma neriuutigaa nunatsinni kalaallit namminneq pigisaminnik sillimmasiisarfeqalerumaartut, taamaaliornikkut aningaasat nunatta iluaniiginnartinneqarsinnaammata.