Sillimmartaarnissamut oqallissaarut ilalerneqarpoq

Silaannaap allanngoriartorneranut sillimmartaarnissaq pillugu Inuit Ataqatigiinneersup Kuupik Kleistip oqallissaarutaa Inatsisartunit ilassilluarneqarpoq, partiinit tamanit isumaqatiginartinneqarluni. Naalakkersuisut suliniutaat taamaalillutik iluatsissimasutut nalilerneqarsinnaasut, avatangiisinut naalakkersuisoq Jens Napaattooq oqarpoq.

- Ilumoorpoq silarput unammillermat, kalaallillu nunaat nutaanngorsarsimasoq silaannaap allanngoriartorneranut sillimasoq naalakkersuisuni siunnerfigut aallaavigalugit inatsisartut naammagisimaarinninnerannik oqariartuuteqarneq tulluarpoq. Jens Napaattooq taama oqarpoq.

Taamaattorli silaannaap kissatsikkiartulernerata kingunerisa ilaatigut piniartut silap allanngorarnerujussuanik oqariartuuteqartarnerat piniagassaalatsisalersimanerallu naalakkersuisup ilisimaarinerarpaa, ernumanerallu paasisinnaanerarlugu.

- Ukiorpassuanngortunili oqallinnerit sivisuallaamik ingerlavallaalersimapput, iliuuseqarnissarlu pisariaqarpoq. Soorlu assersuutigalugu, Atassummit Jakob Sivertsenip siornaakkunnili siunnersuutigisimavaa, umiarsuit tunumut avannaanullu tikiaarnerusalertariaqartut. Tunngavilersuutillu maannalu ukiorpaaluit qaangiutereersut qujanartumik uppernarsineqarput. Piniartut aamma killiffiat ukiorpaalunngortuni eqqartorpavut, taamaattumik piffissanngorpoq iliuuseqarnissaq.

Jens Napaattooq aamma oqarpoq, sillimmartaarnissamut suliniutit aallartereermata suliassaq tullinnguuttoq tassaasoq, nunanut allanut atorfilittatigoornerusumik sunniuteqarnerunissaq. Matumanili nunatsinni atuisut, tassalu piniartut suliniarnermi mininneqassanngitsut erseqqissaatigalugu.

- Piniartut matumani qanimut suleqatigisariaqarpavut, siunissami suleriaqqinnissaq eqqarsaatigalugu. Naalakkersuisoq erseqqissaavoq.

Ilisimasanik katersuiveqalernissaq kiisalu Namminersornerullutik Oqartussani pisortaqarfiit suleqatigiillutik silaannaap allanngoriartornerata kingunerisinnaasai pillugit politikkikkut pilersaarummik suliaqarnissaannik partiit ilaatigut siunnersuuteqarput, suliniutinilli aallartitsisoqareersoq avatangiisinut naalakkersuisoq Jens Napaattooq erseqqissaavoq.