Sillimmartaarniarluni akeqanngitsumik akiuussutissiisoqartussanngortoq
Utoqqaat 65-ileereersimasut allallu navianartorsiortut, soorlu assersuutigalugu katsorsarneqarsinnaanngitsumik napparsimasut suli 65-iliisimanngitsut, pneumokokkerinut akiuussutissamik akeqanngitsumik kapitissinnaassapput.
Taamatullu naartusut erninissaannut qaammatit pingasunngoraangata ilummoornermut akiuussutissamik akeqanngitsumik kapitittassapput.
Akiuussutissiinerit coronavirusimik tunillaassuuttoqalissagaluarpat peqqinnissaqarfiup angummassinnaajunnaarnissaanut pinngitsoortitseqataassasut, Namminersorlutik Oqartussat tusagassiuutinut nalunaarumminni taama allapput.
Inuit soorlu katsorsarneqarsinnaanngitsumik nappaatillit pneumokokkerinik tunillatsittut annertuumik napparsimalernissaat akeqanngitsumik akiuussutissiinikkut pinngitsoortinneqarniarpoq.
Taamatullu naartusut erninissaannut qaammatit pingasunngorpata ilummoornermut akiuussutissamik kapitittassapput. Taamaalilluni meeqqap inunngorneraniit qaammatit siulliit ilummoornermik napparsimalernissaanut illersorneqassaaq.
Akeqanngitsumik akiuussutissiinerit pissutigalugit ikinnerusut napparsimmavimmut unissappata, peqqinnissaqarfik nunatsinni coronavirusi tunillaassuutilerpat angummassinnaanerussasoq, Namminersorlutik Oqartussat allapput.
