Sillimanissamut piareersimatitaqarnerpugut?

Kalaallit Nunaanni ajunaarnersuaqartillugu, soorlu umiarsuit nuannaariartaatit apussagaluarpata, timmisartumik nakkartoqaraluarpat, uuliamik maqisoortoqaraluarpat, nappaassuarmik tunillaattoqaleraluarpat, il.il. Nunatsinni maanna sillimanissamut piareersimatitat naammannersut, Demokraatit sinnerlugit inatsisartuni ilaasortaq, Marie Fleischer, naalakkersuisunut apeqquteqarpoq.

Marie Fleischerip allakkamini ilanngullugu erseqqisaqquaa sillimanissamut piareersimatitat ullumi qanoq suleriuseqartussaanersut, kikkullu akisussaasuunersut.

- Paasineqarpat annaassiniartarneq ”nalinginaasoq” naammaginartumik kivissinnaanngikkipput, taava qanoq ililluta ajunaarnersuarni piareersimaneq kivissinnaassavarput?, Marie Fleischer ilaatigut aperivoq.

- Soorunalimi naalagaaffeqatigiit akornanni ajornerusumik inissisimassannginnatta, aningaasanik amerlanerusunik, sillimanissamut atugassanik, qallunaat naalagaaffiat piumaffigineqassanersoq aamma Marie Fleischerip naalakkersuisunut apeqqutigaa.