Sillimaniarneq sulisunit ernummatigineqarsimavoq

Mexicop kangerliumanersuani uuliasiorfimmi Deepwater Horizonimi sulisut uuliasiorfimmi isumannaallisaanerup ernumanarnera isumalukuutigisimagaat, misissuisimanermi isertuunneqartumi iserpoq.
Allattoq Jaaku Lyberth
juulip 22-at 2010 07:06

Taammaattorli kukkunerit ajornartorsiutillu nalunaarutigigaluarunikkit malersorneqarnissartik ernummatigisimallugu.

Sulisut sulinerminni atugaannik misissuinermi isertuunneqartumi tamanna erserpoq, aviisip New York Timesip pissarsiarisimasaani.

Uuliasiorfimmi atortut ajoquteqarnerat ernummatigalugu sulisut arlaqartut oqarsimapput. Uuliasiorfimmi qaartoortoqarmat sulisut aqqanillit ajunaarput.

Uuliamik qillerineq pingaarnerutinneqarsimanera erserpoq, uuliasiorfimmi atortut aserfallatsaalineqarnissaat isumannaallisaanerlu tunulliunneqarlutik.

Uuliasiorfimmi atortut atortullu aaqqissorneqarnerannut atorneqartut ikinnerpaamik 26-it ajortut imaluunniit ajorluinnartut nalunaarusiami erserpoq.

Isumannaallisaaneq pitsaanerpaasimanngilaq, isumannaallisaanermilu kukkunerit sulisunit nalunaarutigineqaraluarpata, sulisut affaasa missaaniittunit malersorneqaatiginissaat ernummatigineqartoq misissuisimanermi erserpoq.

Sulisut soraarsinneqarsinnaanerannik ernumasaarineq uuliasiortitsivimmit atorneqarsimasoq sulisut ilaannit oqaatigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq