Sillimaniarneq sanngiillivoq
Qulimiguulik Lynx sinerisami nakkutilliissummi Hvidbjørnimi atorneqarpoq, taannatuaavorlu nunatsinni ajutoortoqaraluarpat ulloq unnuarlu piareersimatitaq.
Air Greenlandip helikopterii pingasut nunatsinni naliginnaasumik ilaasunut angallassisut nunatsinni politiinit Kangilinnguanilu sakkutooqarfimmit atorneqarnissaminnut piareersimatinneqarput. Taakku ilaasunik angallassiitigalutik nunatsinni annaassiniarnissamut piareersimatinneqarput.
Taamaatoqaraluartoq, politimester Bjørn Tegne Bay isumakuluppallaanngilaq.
Tamatumunnga pissutaanerarpaa Air Greenlandip piareersimasarnera.
Timmisartortitseqatigiiffik ulloq unnuarlu helikopterimik piareersimatitsinissamut pisussaaffeqanngikkaluarluni, maannamut misilittakkagut aallaavigalugit, Air Greenland saaffigalugu akilertortarpoq, politimester Bjørn Bay aviisimi Jyllandspostenimi apersorneqarluni oqarpoq.
Qulimiguullip ajutoornerata kingorna Kangilinnguani sakkuttooqarfimmut annertunerusumik kinguneqartitsivoq Kalaallit Nunaanni isumannaallisaanermut sanilliullugu.
- Kalaallit Nunaata imartaani pisariaqartinneqarfiup nalaani annaassiniarsinnaanerput annikillisinneqangaatsiartoq tamanna qularutiginagu oqaatigisinnaavara, Kangilinnguani sakkutooqarfimmi stabchef Michael Mouritzen oqarpoq.
Qulimiguulik pingaaruteqartorujussuuvoq inuit ataasiakkaat annaaniarnerini atorneqarsinnaagami, taanna sukkasuumik piarataasinnaagami, Michael Mourtizen.