Sillimaniarneq mingutsitsinerlu pillugit ataatsimiittut

Kalaallit Nunaanni sillimaniarneq, Thulemi sakkutooqarfik kiisalu amerikamiut sakkutooqarfigisimasaanni saliinissaq.

Tamakkuupput inatsisartut nunanut allanut sillimaniarnermullu ataatsimiititaliap kiisalu Folketingip nunanut allanut tunngasunik ataatsimiittartuisalu uani sapaatip akunnerani Københavnimi ataatsimiinnerminni eqqartugaat.

Ataatsimiititaliap siulittaasua Per Rosing Petersen oqaluttuarpoq, eqqartorneqartut ilagigaat nunatsinni amerikamiut sakkutooqarfiini avatangiisit mingutsinneqarsimanerat.

- Saliineq aallartittariaqarpoq, kingornalu aalajangertariaqarparput akiligassaq kiap akilissaneraa, Per Rosing Petersen oqarpoq.

Eqqartorneqartuttaaq ilagaat Kangilinnguani sakkutooqarfiup nuunneqarsinnaanissaa, tunngavigineqarpoq sillimaniarneq eqqarsaatigalugu inoqarfiunerusumiinnissaa pitsaanerussammat.

Ataatsimeeqatigiit aamma isumaqatigiissutigaat siunissami ukiup affakkaartumik naapeqatigiittarnissartik, ilaatigut qaninnerusumik attaveqatigiinnissaq, ajornartorsiutillu eqqartorneqartarnissat pinerullugit.