'Sillimaniarneq allanisulli pitsaatigilinngisaannassaaq'
Nunani avannarlerni siunnersuisoqatigiit avatangiisit pillugit ataatsimiititaliaanni siulittaasoq Ann-Kristine Johanssoq ima erseqqissaavoq:
- Ernumaammernanngitsuunngilaq paasillugu imaani sillimaniarneq taama amigaatigineqartigisoq. Imaani sillimaniarnermut tunngasunik piginnaasakipput, qulimiguullit annaassiniutit aamma angallatit ilaalu ilanngullugit amigaatigineqarput, aallartippoq, nangillunilu:
- Pitsaasumik imaani sillimaniartoqassappat aningaasarpassuit pisariaqartinneqarput. Ajunaartoqassanngippallu pinaveersaartitsisoqartariaqarpoq sillimaniartoqartariaqarlunilu paasivarput, Nunani avannarlerni siunnersuisoqatigiit avatangiisinut ataatsimiititaliaanni siulittaasoq Ann-Kirstine Johansson oqarpoq.
Avatangiisinut ataatsimiititaliami ilaasortat Ilulissani ataatsimiinnertik ullumi naammassivaat. Ataatsimiinnerminni imaani sillimaniarneq aamma silap pissusaata allanngoriartornera oqaluuseraat. Nunani avannarlerni imaani sillimaniarneq pillugu oqallittoqarneq aallaavigalugu Avatangiisinut ataatsimiititaliaq taamatut sammisaqarpoq.
Oqallinneranni paasinarsivoq, Kalaallit Nunaanni qanorluunniit iliortoqaraluarpat nunani allanisulli pitsaatigisunik imaani sillimaniartunik pilersitsisoqarsinnaanngitsoq, tassa Kalaallit Nunaata sineriaa isorartummat inuiaallu ikitsunnguit siammasillutik inissisimammata.
Taamaakkaluartoq nunat avannarliit ataatsimoorlutik suleqatigiinnerisigut nunat tamalaat akornanni kattuffiit, soorlu imaanut tunngasuni kattuffik IMO, issittup imaani sillimaniarnissaq pillugu inatsisiliornissaanut sunnerniarsinnaallugu, taamaalillutik umiarsuit pitsaanerusunik piginnaasallit issittup imaani angalasarniassammata.
- Nunat avannarliit ataatsimoorlutik issittup imaani sillimaniarneq pillugu ikioqatigiinnissamut akisussaaffeqarput, tamatumalu pingaaruteqarnera ataatsimiinnermi maani paasivara, Ann Kirstine Johansson oqarpoq.
