Sillimanerunissaq inatsisartuni inassutigineqarpoq
Imaatigut angallannermi sillimanerunissaq Inatsisartuni ullumi oqaluuserineqassaaq. Atassut siunnersuuteqarpoq angallateeraatillit sillimaniarnermi atortunik nassataqartuarnissamik piumaffigineqalissasut. Siunnersuutigineqarpoq nalunaarasuarnermi atortunik, ajunaalernermi kalerrisaarutinik iputinillu pinngitsoorani angallammiittoqartarnissaanik piumasaqaateqalernissaq.
Sillimanerulernissaq pillugu Siumumit Enos Lyberth, Isak Davidsen-ilu aamma siunnersuutissaqarput.
Angallateeqamik pisinermi annanniutit ilaatinneqartarnissaat mikinerusunillu angallatillit annanniuteqartarnissaat piumasaqaataaleqqullugu Isak Davidsen siunnersuuteqarpoq.
Imaatigut sillimaniarnerup siunnersuuteqarfigineqarnerata saniatigut allanik aamma siunnersuuteqarpoq.
Nunatsinni sukkornermik nappaateqarnerup pinaveersaartinneqarnissaanut katsorsarneqartarnissaanullu iliuusissatut pilersaarummik suliaqarnissamut peqqussuteqalernissaa Demokraatineersup Astrid Fleischer Rex-ip siunnersuutigaa.
Aammattaaq illoqarfinni sikusartuniittuni naatitanik nioqqutissanillu immunnik akulinnik nioqquteqartarnermi akit aalajangersimasut atuutsilersinneqarnissaat pillugu Siumut sinnerlugu Inatsisartuni ilaasortap Ole Thorleifsen-ip siunnersuutaa ullumi aamma oqaluuserineqassaaq.
