Silassamik ilimasaarutit nunallu assiliornerit sipaarniarfigeqqunagit Atlantikup Avannaani Suleqatigiit Folketingip aningaasaqarnermut ataatsimiititaliaanut inassutigaat. Silasiorfiit nuna-assiliorfiillu naalagaaffiup aappaagu sipaarfiginiarpai, aningaasaliissutilli allanngortinnagit
naalagaaffiup nunatsinnut aningaasaliissutaannut, bloktilskudinut, ilanngunneqartalissasut Atlantikup Avannaani Suleqatigiit inassutigaat.
- Aningaasat taakku atorlugit silasiorfinnit nuna-assiliorfinnillu Kalaallit Nunaata atorfissaqartitani nammineq pisiarisalissagaluarpai, Atlantikup Avannaani Suleqatigiit aningaasaqarnermut ataatsimiitiliamut allapput.
Aamma issittumi ilisimatusarneq sipaarniarfigeqqunagu suleqatigiit inassuteqarput. Issittumi ilisimatusarneq aappaagu 1 mio.kr.-nik naalakkersuisut sipaarfiginiarpaat, ilisimatusarnerli sipaarfiginagu aningaasanik amerlanerusunik tunineqartariaqartoq Atlantikup Avannaani Suleqatigiit isumaqarput.
-Issittumi silaannaap qanoq issusia nunarsuup sinnerani susoqarneranik paasinninnissamut matuersaataavoq, Kalaallit Nunaannut Danmarkimullu pingaaruteqaannarani, aammali nunarsuup siunissaanut pingaaruteqartorujussuulluni, Folketingimi ilaasortat Kuupik Kleist Lars-Emil Johansenilu erseqqissaapput. Ilanngullugu siunnersuutigaat Issittumi Ilisimatusarfimmut, internetikkut ingerlanneqartumut, naalagaaffik 4 mio. kr.-nik aappaagumut aningaasaliissasoq.
-Issittumi Siunnersuisoqatigiit suleqatigiinneranni Issittumi Ilisimatusarfik inerititaavoq pitsaasoq, nunallu issittumiittut allat assigalugit Danmark aningaasatigut tapersersuisariaqarpoq, Kuupik Kleist Lars-Emil Johansenilu oqarput.