Silarluk timmisartumik ingerlaqqittussanik 51-inik eqquivoq
Silamik peqquteqartumik Air Greenlandip nunatta iluani timmisartuussineri kinguaattoorfiupput, Danmarkiliartussallu 51-it timmisartorsuarmut anngutinngitsoorlutik.
Allattoq Najaaraq Egede
Timmisartorsuup aallarnissaanut anngutinngitsoortussat tassaapput Nuummiit timmisartut GL548 aamma GL512 Kangerlussuarmut kingusinaarlutik apuuttussat.
Norsaq sulinermi malittarisassat eqqortinnissaannik peqquteqartumik Københavnimut tikittussat utaqqinagit aallartariaqarmat, ilaasussaagaluit kingusinnerusukkut Danmarkimut ingerlaqqittariaqassapput.
Air Greenlandip Danmarkiliartumut ilaasussaagaluit 51-it aqqutissarsiuuppai, tassungalu tunngatillugu nittartakkami www.airgreenland.gl –imi malinnaasoqarsinnaasoq, angallannermut aqutsisoqarfimmi pisortaq Jørgen Erik Andersen oqarpoq.