Silap pissussaata allanngoriartornera pillugu ilisimatuut suleqatigiilerput
Silap Pissusianik Ilisimatusarfimmi pisortaq Søren Rysgaard, suliami siuttuussaaq, suliaq 500 millioni koruunit tungaannut aningaasaliiffigineqarsimavoq.
Silap pissusaata allanngoriartornera inuit pilersitaat qanoq unitsinniassallugu politikerit suliassaraat.
Ilisimatusartut Kalaallit Canadamiullu silap pissusaata allanngoriartorneranut iluaqutaasinnaasut suunersut misissorlugu aallartippaat.
Silaap pissusaata allanngoriartorneranit ajoqutissat kisiisa eqqartornagit illuanulli saatsillugu iluaqutissartai misissuiffigineqalerput.
Søren Rysgaard upernaaq manna Canadami Manitoba University-mi ataqqinaataasumik ilisimatusartutut atorfeqalerpoq, aningaasanillu annertuunik aningaasalerneqarluni. Tulluusimaarluni atorfik akuersaarpaa, piumasaraluguli ilisimatusarneq Canadap Kalaallit Nunaatalu suleqatigiissutigissagaat.
Sulinerlu ingerlalluarsimaqaaq, peqatigiiffiit aningaasaateqarfiillu suliamut ilanngussimapput ilisimatusarnermullu aningaasaleeqataasimallutik, maannalu inuit 100-t ilisimatusarfimmi nutaami, Winnipeg-imi Canada-mi sananeqartumi, atorfinitsinneqassapput. Ilisimatusarfik ilaatigut nunarsuarmi sikunut tankit annersaannik peqassaaq, tassanilu siku qanillillugu misissugarineqarsinnaassaaq.
Søren Rysgaard-i suliamut upernaaru aallartittussamut siulersueqataavoq, apequtillu amerlasuut akineqarnissaannut pissangasoqaqaaq.
- Nalorninartummi amerlaqaat, soorlu Sullualukkut umiarsuarnik assartuisoqassappat, sukkut ingerlasoqassava sumilu umiarsualiviit inissinneqassappat, ineriartornerlu tamanna ilisimatusarnermit tunngaveqanngippat sianiilliornerussaaq, Søren Rysgaard oqarpoq.
Ilisimatusarnerup nutaap annertunersaata ilagaa silap pissusaata allanngoriartornera, taassumalu periarfissanik nutaanik pinngorartitsinera, ilaatigut issittup imartaani angallannermi sillimaniarnerup pitsanngorsarnissaanik ilisimatusarneq. Misissugassat aamma ilagaat qilleriviliat kalaallit nunaata sineriaani sumi iluliarsuarnit, silap kissakkiartornera ilutigalugu sermersuarmit uukkaattartussanit, illersorneqarsinnaanerunersut.
- Uuliasiornermut qillerivissanik inissiiniarnermi ilisimasaq tamanna pingaaruteqassaaq; sumi isumannaanneruva, sumilu ulorianartoqarnerua? Maannalu isumannaakkaluartoq siunissami isumannaattuaannassava?, Silap Pissusianik Ilisimatusarfimmi pisortaq Søren Rysgaard taama oqarpoq.
Ilisimatusarnikkut suleqatigiinneq 2017-imut ingerlasussatut isumaqatigiissutaagallarpoq. Canadami Kalaallit Nunaannilu ilisimatusartut suleqatigiinnissannut isumaqatigiissutaannut ilaavoq taakkua siniffissaqarnissaat, misissuiffissaqarnissaat allaffissaqarrnissaat angalasinnaanissaallu. Ilisimatusartut Canadamiut Nuup kangerluani nuannisarsinnaapput, nunatsinniillu ilisimatusartut Canadamiut sikunik aserorterutaannit misissuisinnaassallutik.
