Silap pissusiisa allanngoriartorneri Aleqap iluaqutissanngortinniarpai

Aviisip Globe and Mailip, Canada tamakkerlugu saqqummersartup, Aleqa Hammondip illersornissamut tunngassuteqartumik ataatsimiinnermi, The Halifax International Security Forumimi, Halifaximi sapaatit-akunnerata naanera ingerlanneqartumi oqalugiaataa allaaseraa.
Allattoq Marianne Stenbæk, Montreal, Canada, Simon Uldum
novembarip 25-at 2013 07:50

Globe and Mail naapertorlugu, Aleqa Hammondip silap pissusiisa allanngoriartorneri allanut naleqqiulluni iluatinnartoqartippai, periarfissanik nutaanik nassataqartussaanerarlugit.

Sermermi nungukkiartortillugu aperpiassaariartortillugulu qaqqat tikikkuminarnerulissapput, qaqqavullu ujarassiornikkut aningaasarsiornikkullu soqutiginaateqartupilussuullutik. Qaqqavummi pisuussuteqarpassuaqarput, savinissamik, diamantinik kuultimillu, taakkulu siornatigut tikinneqarsinnaasimanngillat, Aleqa Hammond oqarpoq.

Aleqa Hammond Globe and Mailimit apersorneqarluni oqarpoq, maanna inissisimaneq Kalaallit Nunaannut iluaqutissanngortinniarlugu. Ukiuni 4500-ni maani inuuvugut, silallu pissusiisa allanngorarneri anigortarsimallutigit, taamaammat allanngoriartornernik eqqugaasutut immitsinnut isiginata tamatumuuna uatsinnut iluaqutissanngortikkusuppagut, Naalakkersuisut siulittaasuat oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq