Silap pissusiata allanngoriartornerata kingunerisassaanik nalunaarusiaq isumalluarnanngivissoq

Kiarujussuartassaaq, orpippassuillu ikuallarujussuartarlutik, imermillu nerisassanillu mingutsinneqarsimasutigut nappaatinik tunillatsissinnaaneq annertusisimassaaq, inuillu millionillit qimaasutut inuusariaqalissallutik.

Kingunerluutaasinnaasut ilungersunartut Naalagaaffiit Peqatigiit silap pissusianut tunngatillugu ataatsimiititaliaata nalunaarusiaani, tuluillu aviisiata The Independentip "silap pissusiata allanngoriartornerata kingunerisassaanik misissuinerit annersaattut" taasaani, nassuiaatigineqartut ilaminiinnannguaraat.
Nalunaarusiami misissuinerit tuusintillit toqqammavigineqarput, nunarsuarlu tamakkerlugu ilisimatuunit ataqqisaanerpaanit hunnorujulinnit suliarineqarsimalluni. Nalunaarusiaq tamakkerlugu marsip naanerani avammut saqqummiunneqassaaq.

Nalunaarusiamittaaq silap pissusiaisa allanngoriartornerisa nunarsuarmi naatitanik katersukkanik pissarsiat ikilinissaat aamma siulittuutigineqarpoq, tamannalu meeqqat naammatsillutik nerisanngitsut amerlinerannik kinguneqassangatinneqarpoq.

Aningaasaqarniarnikkut ilungersunartorsiornerit piitsuussuserlu pissutigalugit, nunarsuarmi aporaannerit nunallu innuttaasuisa sorsuuttarneri amerlissapput, aporaattoqarneratalu inuussutissaaleqinerullu kingunerisaannik qimaasorpassuaqalissaaq.
 
Aammattaaq qarsutsinerujussuit arlanerulissapput.
 
Silallu pissusiisa allanngoriartornerisa kingunerluutaat nunanut siuarsarniakkanut ukiut tuusintillit naalernerini tupaallannanngitsumik malunniuteqarnerpaajussapput. Kangiatalu eqqugaanerpaasut ilagissagaat nalunaarusiami allaaserineqarpoq.

Nunanullu Killernut kingunerluutaanerpaasut tassaassangatinneqarput inuussutissat akitsoriartornerat.