Silap pissusiata allanngoriartornera Pinngortitaleriffiup sammitinnialerpaa

Silap pissusiata allanngoriartornerujussua Issittumi ukiuni kingullerni malugineqarsinnaalluartoq, Pinngortitaleriffimmi ulluni makkunani isumasioqatigiinnermi sammineqarpoq.
juunip 06-at 2014 05:16

Isumasioqatigiinneq kalaallit Canadamiullu ataatsimoorullugu suliniutaanut AACA-mut - tassa Adaption Actions for a Chaning Arctic - Issittup allanngoriartorneranut naleqqussarnermik taanna kalaallisut taasinnaasatsinnut ilaavoq.

Issittumi Siunnersuisoqatigiit suliniummik aallarnisaasuupput, taakkuni ilisimasanik katerserusupput, katersukkatillu nunani issittumiittuni aalajangiisartunut ingerlateqqittarniarpaat.

Suliniummi suleqataasut Nunatsinneersut, Canadameersut, Danmarkimeersut Norgemeersullu isumasioqatigiinnerminni aatsitassarsiornermik aalisarnermillu suliaqartunik soqutigisaqaqatigiinnillu soorlu ICC-meersunik, KNAPK-meersunik aamma Sulisitsisut Peqatigiiffianneersunik Namminersorlutillu Oqartussaneersunik naapitsissapput.

Suliniut 2017-ip tungaanut ingerlanneqartussaavoq, ukiunilu tulliuttuni soqutigisaqaqatigiinnik isumasioqatigiissitsisassallutik. Isumasioqatigiissitsinerit siullersaat KANUKOKA-meersut peqatigalugit Qaqortumi ukiormanna marsimi pivoq.