Avatangiisit Nunanit allanit

Silap pissusiata allanngoriartornera Alaskami nunaqarfinnut arlalinnut akisuupilussuussaaq

Sermip aakkiartornera imaatalu qaffakkiartornera pissutigalugit nunaqarfinni qarsutsineqarnissaa pinngitsoortinniarlugu nunaqarfiit allamut nuunneqassanersut Alaskami nunaqarfinni arlalinni aalajangiiffigineqartariaqassaaq.
Amerikamiut præsidentiata Obamap silap pissusiata allanngoriartornera nammineerluni takujumallugu nunaqarfiit matoqqajaasut ilaat Kivalina ukiut marluk matuma siorna Alaskamiinnermini timmisartumik qulaappaa Assi © : Flickr Creative Commons
Allattoq Marianne Stenbæk, Montreal, Canada
novembarip 30-at 2016 08:46
Nutserisoq Simon Uldum -

Alaskami nunaqarfiit illoqarfiillu katillugit 31-t silap pissusiata allanngoriartorneranit ulorianartorsiortinneqarput, taakkunanimi ukioq 2030 nallertinnagu qarsutsineqarnissaa qularnarunnaarmat.

Taakkunanilu eqqugaanerpaasussatinneqartut tassaapput Inuppiaat nunaqarfii sisamat.

Amerikamiut præsidentiata Obamap silap pissusiata allanngoriartornera nammineerluni takujumallugu nunaqarfiit matoqqajaasut ilaat Kivalina ukiut marluk matuma siorna Alaskamiinnermini timmisartumik qulaappaa. Nunaqarfik Kivalina 300-nik inoqarpoq ipiutamilu inissisimalluni. Nunaqarfiup qullasinnerusumut nuunneqarnissaa aalajangiunneqarsimavoq, taamaaliornissamullu aningaasat nassaarineqaqqaartussaapput nunaqarfiup nuunneqarnissaa 1 milliard koruuninik akeqassasoq naatsorsuutigineqarmat.

Inuppiaat nunaqarfianni allami, Shaktoolimmi, Bering Strædemi Nomep kitaaniittumi, nuunniarnatik aalajangersimapput nunaqarfitoqqamillu pigiinnarnissaa maanna ilungersuutigalugu.

Inuppiaalli nunaqarfinnit arlalinnit silap pissusiata allanngoriartornera pissutigalugu nuuttariaqarnissaat qularnanngilaq, soorlu aamma nunarsuarmi sumiiffinni allani taamatut inissisimasoqartoq.

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq