Silap pissusia pillugu naalakkersuinikkut siuttut suliniuteqartariaqarput
Nunat avannarliit Københavnimi 2009-mi silap pissusia pillugu naalakkersuinikkut siuttut ataatsimiinnissaanni ataatsimoorlutik suliniuteqartariaqarput.
-Silap pissusia pillugu naalakkersuinikkut siuttut ataatsimiinnissaat nunarsuarmut tamarmut itsuartorfinngorsinnaavoq tupinnaannartoq. Tamatumani nunani avannarlerni eriagisat, nunani avannarlerni ilisimatusarneq kiisalu nunani avannarlerni avatangiisinut nukissiuuteqarnermullu teknologiit ineriartortinnissaat ersersissinnaavavut.
Taama oqarpoq Ole Stavad, Socialdemokratini Nordisk Rådimut siulittaasoq. Nunat Avannarliit siunnersuisoqatigiiffianni Socialdemokratit aamma Venstresocialistisk Grøn Gruppe Nunat Avannarliit siunnersuisoqatigiiffiannut Naalagaaffiit Peqatigiinni 2009-mi naalakkersuinikkut siuttut ataatsimiinnissaannut atatillugu nunat avannarliit ataatsimoorlutik suliniuteqarnissaannut kajumissaaruteqarput.
Line Barfod, Nordisk Rådimi atugarissaarnissaq pillugu ataatsimiititaliami ilaasortaq Enhedslistelu sinnerlugu Folketingimi ilaasortaq inuinnaat peqataanissaannik pingaartitsivoq:
-Silap allanngoriartornerata inunnut kingunerisassai imaannaanngitsorujussuanngorsinnaapput. Inuit inuiaqatigiillu eqqorneqarnerpaajusussat Nunanit avannarlernit tapersersorneqartariaqarput. Tamakkua Københavnimi sorsuutigissavavut. Nunat avannarliit tungaannit inuinnaat peqataanerat annertusarsinnaavarput, taamaalilluni naalakkersuinikkut siuttut ataatsimiinnissaanni siuttuinnaat kisimik siuttooqqunagit. Silap pissusianut tunngasumik ajornartorsiutit nunami issittumi assorsuaq erseqqaripput, taamaattumillu suliassaqarfik taanna kiisalu silap pissusia pillugu naalakkersuinikkut siuttut ataatsimiinnissaanni tassani immikkut sammineqartariaqarluni, Line Barfod isumaqarpoq.
