Silap pissusaata Europamut sunniutigisassai

Europami siunissami silap qanoq innissaa pillugu nalunaarusiami oqaatigineqarpoq Skandinaviami ukiukkut sila kiannerulissasoq, avannaata kitaani, soorlu Tuluit Nunaanni qarsutsinersuit takusariikkavut akulikinnerulissapput, Europallu kujasinnerusortaani panernersuaqarnerit orpippassuillu ikuallanneri akulikinnerulissallutik. Ippernat assigiinngitsut nappaatinik tunillaasinnaasut, soorlu ippernat nappaatinik tunillaassuisinnaasut Asia-meersut aamma Europami takussaalissangatinneqarput. Naalagaaffiit Peqatigiit ataanni silap pissusaata allanngoriartornera pillugu immikkut ilisimasallit paasisaat, kiisalu Europamiut silap pissusaa pillugu misissuisut paasisaat ataatsimoortillugit nalunaarusiami aallaavigineqarput. Ukiut tulliuttut hunnorujut ingerlaneranni 1-imiit 5 gradit tikillugit Europami silap kiannerulernissaa naatsorsuutigineqarpoq, nunarsuarpullu tamaat ataatsimut isigalugu 4 gradit missaannik sila kiannerulissangatinneqarluni. Assersuutigalugu taaneqarpoq ukioq 2003-mi panernersuaqarnera Europamiut 70.000-it inuunerannik akeqartoq. Tassa ilaatigut tamakku akulikinnerulissapput, silaannarmili CO2-p annertusinerata aamma orpiit sukkanerusumik naajartortilerpai.