Silap pissusaata allanngoriartorneranik takornariat amerliartupiloorput
Inuit 60.000-it siorna takornariarput - affai timmisartumut affaalu umiarsuarnut takornariartaassuarnut ilaallutik tikittuullutik. Naatsorsuutigineqarpoq takornariap ataatsip aningaasat 20.000- 40.000 koruunit sermersuarmik takornariarnissaminut atortarai.
Sermersuarmik takuniaallutik allat Sikuijuitsoq kujallermukartarput, Canadap avannaanukartarlutik imaluunniit Svalbardimukartarlutik. Sermersuup qeriuaannartup aakkiartornera aamma nannut nerisassarsiortut takuniarneqartarput.
- Silap pissusaata allanngoriartornerata kingunerisaanik Kalaallit Nunaat takornariarfissatsialattut nittarsaanneqarpoq, uagut piseqqusaarusiortussaasuugutta akilersinnaanngisatsinnik, taamaammat ilimagaarput nunarsuarmi sila pillugu oqallinneq Kalaallit Nunaannut 300 millioni koruuninik naleqarsimassasoq, Nunatsinni takornariartitseqatigiiffimmit Mads Nordlund Jyllands-Postenimut oqarpoq.
