Silap pissusaata allanngoriartornera uppernerup akiorsinnaavaa
Palasit, palasiunerit biskoppillu katillugit 30-t Sverigimi illoqarfiit ilaanni Uppsalami sapaatip akunnerata naanerani ullut marluk naapisinneqarsimapput.
Sverigimi ærkebiskoppip, Anders Wejrydip, tassani oqaatigaa, upperisaq uppernerlu tassaasut neriunnerup matuersaatai, taamaammallu nunarsuatsinni silap pissusaata allanngoriartornera upperisap uppernerullu akiorsinnaagaat. Tysklandimi nutaarsiassaqartitsivimmi Det Tyske Prese Agenturimi taama allaaserinnittoqarpoq.
Kalaalit Nunaanniit peqataavoq biskoppi Sofie Petersen, ilaatigullu oqarpoq, ”nunarsuaq kikkut tamarmik akisussaaffigigaat”, taavalu ”inuunerput eriaginartuusoq, paarilluartariaqarippullu”.
Nutaarsiassaqartitsivimmi Det Tyske Presse Agenturimi allaaserisat naapertorlugit Sofie Petersen aamma ima oqarsimaneragaavoq: - Silap pissusaa Kalaallit Nunaata nammineq akisussaaffigisariaqarpaa.
