Silap pissusaata allanngoriartornera meeqqat atuagaanni sammineqarpoq
Atuagaq meeqqanut arfineq pingasut aqqaneq-marlullu akornanni ukiulinnut naatsorsuussaavoq.
Nukappiaqqap Tulukkap tulukkatut timmisinnaanissani sinnattoriuaannarpaa. Sermersuup anersaava naapippaa, pinngortitallu mingutsinneqarneranit annaassiniarnermini silallu kiatsikkaluttuinnarneranut iliuuseqarniarnermini ikioqqulluni.
Tamatuma kingorna nanoq, nattoralik, arfeq uumasullu allat naapippai, taakkualu tamarmik immikkut tunissuteqarfigaat. Taakku Sassuma Arnaanut ingerlateqqissavai. Oqaluttuatoqarmi najoqqutaralugu inuit isumaalliorlutik pissusilersorsimagaangata inuussutissanillu atuilussinnarsimagaangata, taanna saammarsarneqartussaammat.
Lana Hansen atuakkiortuuvoq, eqqumiitsuliortullu Georg Olsenip atuagaq assiliartalersorpaa.
Atuagaq Jette Brandtimit ilusilersorneqarpoq. Eqqumiitsuliortup Julie Edel Hardenbergip atuakkiaanik taanna ilusilersuisartutut ilisimaneqarpoq.
Atuagaq "Sila" kalaallisut tuluttullu saqqummersinneqarumaarpoq, silallu pissusaa pillugu ukioq manna oqallinnerujussuarmut taamaalilluni tapertaasinnaassalluni.
