Silap pissusaata allanngoriartornera ilungersunartoq

Nunarsuatsinni innuttaasut immikkoortunut pingasunut agguataaraanni, immikkoortut marluk isumaqarput, silap pissusaata allanngoriartornera ajornartorsiutaasoq ilungersunartoq, tamanna inunnik 24.000-inik isumasiuinerup ersersippaa.
Allattoq Elisa Isaksen
decembarip 07-at 2009 11:43

Misissuinermi, Tuluit Nunaanni BBC-mit ingerlanneqartumi, aperineqartut 63 procentiisa silap pissusaata allanngoriartornera, ajornartorsiutitut ilungersunarluinnartutut isigaat.

Matumani aamma soqutiginarpoq taamatut isumaqartut Brasiliami 86 procentiullutik amerlanerpaammata, Indiamili aamma USA-mi 44 procentiusut.

Aningaasanut tunngasut COP15-imi isumaqatigiinngissutigineqartut annersaannut ilaasussaapput. Nunat suliffissuaqarfiusut, nunanut ineriartortunut, silap pissusaata allanngoriartorneranut iliuuseqarsinnaanissamut, ilaatigut teknikkimut tunngasunik nutarterinissamut qanoq aningaasaliissanersut oqallisigineqassaaq, taamaalilluni silap pissusaanut iluaqusiisinnaaniassammata.

Aperineqartut 61 procentiisa, naalagaaffigisamik silap pissusaata allanngoriartorneranut iliuuseqarnissamut aningaasaliinissaa isumaqatigaat, naak tamanna aningaasaqarnermut aamma ajorseriaataassagaluarpalluunniit.