Silap pissusaata allanngoriartornera ataatsimiissutigaat
Anders Fogh Rasmussen, Connie Hedegård-ilu aamma ilaapput. 2009-mimi FN-ip ataani, silap pissusaata allanngoriartornera Naalakkersuisutigoortumik Københavnimi ataatsimiissutigineqartussaavoq. Maanna ataatsimiinnermi USA-p præsidentiata, George Bush-ip, peqataannginnera maluginiarneqarluarpoq. Piffissaqannginnamigooq.
Silap pissusaata allanngoriartornera pillugu Naalakkersuisutigoortumik ataatsimiinneq ulloq ataasiinnaq ingerlanneqarpoq, pisarnertut FN-nip ataatsimiinnissaa aqagu aallartittussaq sioqqullugu. FN-illu qullersaata nalunaarutigaa ullumi ataatsimiinneq, ukiut qulit matuma siorna Kyoto-mi isumaqatigiissutip, 2009-mi Københavnimi ataatsimiinnissami nutaamik taarserneqarnissaanut aallarnisaataasoq. Silarsuarmili pissaaneqarnerpaaq ataatsimeereernermi nereqatigiinnissamut taamaallaat ilaaniarluni nalunaarsimavoq. USA-milu naminneq aaqqissuussaminnik sisamangorpat tallimanngorpallu silap allanngoriartornera pillugu ataatsimiisitsissamaarput, oqaluuserisassat tassani aqussinnaanerujumallugit, nunallu annerit 16-iinnaat naalakkersuisui qaaqqusimallugit, taakkualu amerlanerit USA-mut isumaqataareersuupput. Bush-ip silap pissusaata allanngoriartornera ilungersunartuusoq nassuerutigigaluarlugu isumaqarpoq nunat namminneq qanoq iliuuseqarnissatik aalajangissagaat, nunat assigiinngitsut isumaqatigiillutik iliuusereqqusaannit killilersorneqaratik. Taamaammallu aasaq G-8-meersut ataatsimiineranni Tysklandimi kanslerip, Angela Merkel-ip; 2050-iutinnagu gassit silaannarmik kissakkiartortitsisut ullumikkumut naleqqiullugit affaannanngortinneqarnissaannik siunnersuutaa isumaqatigisinnaanagu. Ullumikkut George W. Buship ataatsimeeqataannginnerani Amerikamiut allat marluk peqataasut maluginiarneqassagunarput, tassa Californiami guvernøri Arnold Schwartzenegger USA-milu vicepræsidentiusimasoq Al Gore, taakku marluullutik Buship politikkianut akerliupput EU-milu siunniussat isumaqatiginerullugit.
Pinngortitaq Pillugu Nunarsuaq Tamakkerlugu Suliniaqatigiiffimmi silap pissusaa pillugu suliaqartoq, John Nordbo oqarpoq, Naalagaaffiit Peqatigiiffianni silap pissusaata allanngoriartornera akiorniarlugu suliniutaat, Buship allamut saatinniarsarigaa, naak silap kissakkiartornera ilungersunartutut isigineraraluarlugu.
Pinngortitaq Pillugu Nunarsuaq Tamakkerlugu Suliniaqatigiiffimmit Danmarki kaammattorneqarpoq USA, Canada, Japan Australialu Naalagaaffiit Peqatigiiffianni suliniutinut isumaqataatilersinniaqqullugit.
- Tassa maanna Kalaallit Nunaanni sermersuarmukaqattaarnerit politikkikkut suliniutinik inerniliinissanik kinguneqartussanngorput, John Nordbo Ritzau-imut oqarpoq.
