Silap pissusaata allanngoriartornera akiorniarlugu isumaqatigiipput
Nunat pisuujunerpaat arfineq-pingasut, aamma G8-mik taaguuteqartinneqartut, gassimik silaannarmik kissakkiartortitsunik aniatitsisarnertik 2050-iutinnagu 80 procentinik annikillisinniarpaat. Silallu kiassusaata agguaqatigiissillugu 2 gradit qaangernagit qaffariartitsinneqarnissaa aamma isumaqatigiissutigineqartoq, ulloqeqqanut radioaviisimi tusarliupparput.
Allattoq Mads Lynge
juulip 08-at 2009 16:58
Anguniakkalli anguneqassappata aningaasartuuteqartoqartariaqassaaq. Qaquguli aningaasaliisoqassanersoq nalunarallarpoq, aningaasaliinissat ukiamut kinguartinneqaramik. Nunat pisuujunerpaat 20-t septembarimi ataatsimiittussaapput, iliuusissanullu aningaasaliinissaq aalajangiiffigineqarumaartoq, Sverigep ministeriunerata, EU-mi maanna aamma siulittaasuusup, Fredrik Reinfeldtip oqaatigaa.
- G8-mik taaguuteqartinneqartut ataatsimiinneranni immikkut taasarialittut angusaqarluarpugut, silammi kiassusaata agguaqatigiissillugu 2 gradit qaangernagit qaffariartinneqarnissaa USA-mit isumaqatigineqarpoq, Sverigep ministeriunera Tuluit nutaarsiassaqartitsivianut Reutersimut oqarpoq.
Nunat pisuut Italiami L'Aquilami ulluni makkunani ataatsiipput.
