Silap pissusaanut tunngasut kukkuneqaqaat
Danmarkimi aviisit ullormut saqqummersartut silap pissusaanut tunngasunik ilisimatusarnernik allaaserisaminni issuartagaasa affaanni paasissutissat eqqortuuneq ajorput. Nittartakkami videnskab.dk-mi taama allaaserinnittoqarpoq.
Tusagassiortunngorniap Gunver Lystbæk Vestergaardip aviisini allaaserisat 88-it, aamma ilisimatuussutsikkut nalunaarusiat allaaserisani tunngavigineqartut atuaqqissaarnerini pipallatanik assersuutissarpassuarnik naammattuugaqarsimavoq.
- Allaaserisani aqqaneq-marlunni silap kiatsikkiartorneranut tunngasut kukkusumik nalunaarneqarsimapput. Allaaserisani pingasuni ississutsimut kiassutsimullu uuttuutit fahrenheit-ip aamma celsiusip assigiinngissusaannut tunngassuteqarput, oqaatigineqarluni kukkuneq pilersimasoq, tusagassiortup Amerikamiut nutaarsiassaqartitsiviannik issuaasimaneranik pissuteqartoq, Gunver Lystbæk Vestergaard videnskab.dk-mut oqarpoq.
Allaatigisani ilaatigut allassimavoq, Sikuiuitsoq Kujalleq 4,5 gradinik kiannerulersimasoq aamma Tunumi Kujataanilu sermersuit ukiumut meterimik ataatsimik milleriartartut.
Pissutsinili piviusuni Sikuiuitsumi Kujallermi taamaallaat 2,5 gradinik kiannerulersimavoq aamma sermersuaq Kujataani milliartornani alliartorpoq.
