Silap pissusaanut ilisimatuarfissaq eqqaartorpaat

Ilisimatusarnermut ministeri Helge Sander aamma ilisimatusarnermut naalakkersuisoq Tommy Marø Ilisimatusarfissarsuaq Ilimmarfik pillugu ullumi ataatsimeeqatigiipput. Taakkua Nuummi silap pissusaanut ilisimatusarfiliortoqarsinnaanera atorfilittaminnut misissortinniarlugu isumaqatigiissutigaat.

Helge Sander ima nassuiaavoq:

- Suliniutissamik isumaqatigiissuteqarpugut, tassa apeqqut taanna silap pissusaanut tunngasoq, Kalaallit Nunaanni Danmarkimilu soqutigineqaqisoq pillugu isumaqatigiissuteqarpugut, Helge Sander oqarpoq.

Taassuma Tommy Marø-llu isumaqatigiissutigaat atorfilittatik qaammatini arlalialunni tulliuttuni isummerfigissassamik suliaqassasut, taamaalillutik suliniut aalajangersimasumik aallaaveqarlutik isummerfigisinnaaniassagamikku.

- Tassami isummerfigisariaqakkavut ilaatigut tassaapput ilisimatusarfissaq sumi inissinneqassanersoq aamma qanoq aningaasalersorneqassanersoq.

Tamatumunnga atatillugu ataatsimeeqatigiinnitsinni ilanngullugu ilisimatitsissutigaara Danmarkimi siorna isumaqatigiissutigineqartunik nunarsuarmioqataanermut aningaasaliissutissanik, 2008-mi isumaqatigiinniutigineqaqqittussanik peqarluta. Taakkualu naalakkersuinikkut amerlanerussuteqartunit tapersersorneqarnissaat isumaginiartussaavara, Helge Sander oqarpoq.

Tassa maanna atorfilittat ilisimatusarfissap qanoq aaqqissuunneqarnissaa sumilu inissisimanissaa misissoqqissaartussanngorpaat.

- Suleqatigiissitaliap ilaatigut misissussavaa ilisimatusarfissaq Nuummi allamiluunniit inissinneqassanersoq. Ilaatigullu ilisimatusartutut atorfeqartussat atorluarnerujumallugit, piffissap ilaani assersuutigalugu Nuummi sulisarnissaat piffissallu ilaani Danmarkimi sulisarnissaat pisariaqassaaq, Helge Sander naggasiivoq.

Atorfilittat Danmarkimeersut nunatsinneersullu silap pissusaanut ilisimatusarfiliornissaq pillugu suliassartik novembarimi naammasseriissagaat naatsorsuutigineqarpoq.