Silap pissusaa pillugu isumaqatigiittoqannginnera assuaraat
Qalunaat aviisianni Berlingske Tidendemi ullumi saqqummersumi, silap pissusaa pillugu isumaqatigiittoqarsimannginnera ministeriunerup atorfilittaasa annertuumik akisussaaffiginerarlugu John Norbo-p Verdensnaturfondimeersup allaaserisimavaa.
Ministeriunerup siunnersorneqarsimanera pitsaasimanngilaq, tassami ataatsimeersuarnerup nalaani Danmarki sumulluunniit attuumassuteqarani kikkut tamarmik kattussuuffigisassaatut naatsersuutigineqarsimagaluarpoq, illuatungaannarsiortutulli pissusilersortutut ataatsimeersuaqataasunik pasillerneqaqattaaginnalersimalluni.
Københavnimimi isumaqatigiissutaasoq sumulluunniit atorneqarsinnaanngilaq, allaammi CO2-mik aniatitsinikinnerulernissamik, nunanullu ineriartortunut siunissamut aningaasaleeqataarusunneq EU-p nammineq siunniussimasaralua qatagiinnasimasutut taaneqarsinnaalluni, saniatigullumi Kina-p USA-llu isumaqatigiissinnaanerigaluat ataatsimeersuarnerup naajartulernerani ungasilliinnarsimasugalluni.
Mexicomili, kingornatigullu Tysklandimi silap pissusaa pillugu tullissaanik ataatsimeersuartoqalerpat suliffeqarfissuit namminneq aaqqiissutissanik siunnersuusiorsinnaanissartik periarfissaassaaq, tassami una ataatsimeersuarneq suliffeqarfissuarnit aamma malinnaavigilluarneqarsimavoq, akisussaaqataanertillu eqeersimaarfigilersimammassuk ataatsimeersuarnerup inernerisa pitsaanersaattut taaneqarsinnaavoq, taama John Nordbo Verdensnaturfondimeersoq oqaaseqarpoq.
Nunatta Danmarkillu silap pissusaanut tunngassutilinnik isumaqatigiissuteqarsimanerat ilisimareerparput, tassami 2020-mi nunatta CO2-mik aniatitsinera 2007-imut naleqqiullugu 5%-imik annikillineqarnissaa isumaqatigiissutip pisussaaffiliimmatigut. Isumaqatigiissulli inuiaat naliginnaasut akornanni atuuttussatut naatsorsuussaavoq, tassa suliffissuit aatsitassarsiornerlu CO2-mik aniatitsinerunermik kinguneqassagaluarpata annikillisaanissatsinnut pisussaaffitsinnut tunngassuteqassanngilaq.
