Silap pissusaa pillugu isumaqatigiissutissaq oqaluuseraat

Naak ullup aallartisimalaaginnarnerani isumaqatigiinngittoqaraluartoq, isumaqatigiissutip kingusinnerpaamik decembarimi isumaqatigiissutigivinneqarnissaa aalajangiunneqarpoq.

Danmarkip Radioata nittartagaani taama allaaserinnittoqarpoq.

Pissutsit immikkuullarissut nunani ataasiakkaani atuuttut isumaqatigiissummut ilaatinneqarnissaat aamma isumaqatigiissutigineqarpoq, isumaqatigiissullu ministeriunerup Anders Fogh Rasmussenip iluaraa:

- Isumaqatigiissutigineqartut inerneri tulluusimaarutigaakka, akimmiffiusimagaluartullu puigorneqapallakkumaarput, Fogh aviisimut Politikenimut oqarpoq.

Silap pissusaa pillugu Københavnimi aappaagu ataatsimiittoqannginnerani silap pissusaanut iluaqutaaniartussamik isumaqatigiissutip EU-mi sukkanerpaamik atuutilersinneqarnissaa pingaaruteqartoq, Politikenimi allaaserineqarpoq.

CO2-mik aniatitsineq 20 procentimik appartinneqarani 30 procentimik appartinneqarnissaa EU-mi nunat assigiinngitsut siuttuisa anguniarsarisussaavaat.