Silap pissusaa pillugu isumaqatigiissuteqarnissaq qularaa
Silap pissusaa pillugu ataatsimeersuarneq COP 15 naammasseriitsiaannartoq, taamanikkut Danmarkimi silap pissusaanut ministeriusup maannalu EU-mi silap pissusaanut kommissæriusup Connie Hedegaardip, ataatsimeersuarnerup inerneri, Mexicomi COP 16-imi inatsisitigut pituttuisumik isumaqatigiissuteqarnissamut aqqutissiuineraraluarpaa.
Ataatsimeersuarnissaq tulliuttoq ukiormanna novembari naalerpat pisussaavoq.
- Mexicomi ataatsimeersuartoqarnissaanut piffissaq sivisujunnaareerpoq, Connie Hedegaard oqarpoq, nangillunilu: - Novembarimi aalajangersimasunut tunngasunik isumaqatigiissuteqarnissaq siunnerfigineqarpat immaqa pitsaanerussaaq, soorlu aningaasalersuinissamut, naleqqussarnissamut teknikkimullu tunngasunik isumaqatigiissusiornikkut. Aatsaallu taamaaliortoqareerpat Sydafrikami 2011-mi inatsisitigut pituttuisumik isumaqatigiissusiortoqarluni, Politikenimut ilaatigut taama oqarpoq.
Hedegaard taama nalunaaruteqarpoq, Naalagaaffiit Peqatigiit silap pissusaata allanngoriartorneranut allaffeqarfianni pisortap Yvo de Boer-ip aamma Kinap silap pissusaanut aallartitaata, Yu Qingtai-p, Mexicomi ataatsimoorussamik isumaqatigiissuteqarnissap ajornakusoornissaanut tunngasumik oqaaseqareersullu.
Connie Hedegaardip siunnersuutigaa, nunat EU-mut ilaasortat 27-usut, ataasiakalaarlugu ineriikkamik isumaqatigiissuteqaratik, "alloriarnerit ataasiakkaat" atorlugit ukiuni arlalinni isumaqatigiissutissaq piviusunngortikkiartuaassagaat.
