Silap pissusaa pillugu iliuusissatut pilersaarut piariilerpoq
Taassuma isumaa naapertorlugu, iliuusissani CO2-mik aniatitsinerup minnerulersinnissaa pingaarnersaavoq.
Suliniutissani CO2-mik aniatitsinnerup minnerulersinneqarnissaa pingaarnersaavoq. Missingersuullu siulleq 2009-mi januaari aallartilaarpat piariissaaq.
- Suliniutissani pingaarnertut misissorniarneqarpoq, inuiaqatigiinni kalaallini sutigut CO2-mik aniatitsinerup minnerulersinneqarsinnaanera tamannalu qanoq aningaasartuutaatigissanersoq.
- Siornatigulli suliniutigalugu aallartinneqareersut ilagaat nukissiuuteqarnermi erngup nukinganik atuineruleriartorneq, tamannalu aningaasarpassuarnik aningaasaliiffigineqartareerpoq, siunissamilu ingerlatiinnarneqassalluni, Michael Pedersen oqarpoq.
Naak silap pissusaanut tunngatillugu suliniutissani CO2-mik aniatitsineq pingaarnerutinneqaraluartoq, Michael Pedersen isumaqarpoq, silap pissusaanut tunngatillugu isumaqatigiissuteqartoqassappat, Kalaallit Nunaata immikkut ittumik isumaqatigiissuteqarnissaa pisariaqartinneqartoq.
- Aatsitassarsiornikkut ingerlatsinissamik pilersaarutit angisuut, soorlu Alcoatut ittut CO2-mik aniatitsinerulernermik kinguneqartussaapput. Taamaattumik tamatumunnga tunngasumik Kalaallit Nunaata immikkut ittumik Danmarkimut isumaqatigiissuteqarnissaa pisariaqarpoq. Tassami ullumikkornit annerusumik CO2-mik anititsisoqalersussaammat, Michael Pedersen oqarpoq.
Taanna aperineqarami suliffissuaqarnermik ineriartortitsinerup aamma CO2-mik aniatitsinerup minnerulersinniarnera imminnut akerleriinnersut, akivoq Kalaallit Nunaanni pissutsit immikkut ittut attuuttut isiginiarneqartariaqartut. Tassami ineriartornermi siunnerfigineqartut ilaatigut tassaammata aatsitassarsiorneq uuliasiornerlu. Taakkua CO2-mik aniatitsinerup annerulerneranik kinguneqartussaammata, tamanna pillugu immikkut ittumik isumaqatigiissuteqarnissaq pisariaqartinneqarpoq. Tamatumalu nunarsuarmioqatigiinnit Danmarkimillu paasineqarnissaa pingaaruteqarpoq, Michael Pedersen naggasiivoq.
Attaveqarnermut avatangiisinullu naalakkersuisoq Kim Kielsen ippassaq Poleniliarluni aallarpoq, Naalagaaffiit Peqatigiit 14-issaanik silap pissusaa pillugu ataatsimeersuartitsinerani peqataajartorluni. Taassuma Danmarkimi silap pissusaanut ministeri Connie Hedegaard ullumi ataatsimeeqatigissavaa, matumani kalaallit immikkut ittumik isumaqatigiissuteqarsinnaaneranut periarfissat oqaluuserineqassapput.
