Silap pissusaa pillugu ilisimatusarneq Frankrigimi periarfissaalerpoq

Parisip eqqaani illoqarfiup Versaillesip universititiani ilisimatusaatit ilagissavaat, silap pissusaa pillugu ilisimatusarneq aammma issittumi inuiaqatigiit pissusiinik misissuinerit.

Jean-Michel Huctin ukiorpassuarni Uummannami najugaqarsimasoq, nunani issittuni misissuinerni aammalu ilisimatusarnerni Arctic Institutimik pilersitsinermi suliniaqataasoq oqarpoq, suliniut qangali eqqarsaatigineqarsimasoq:

-Ukiorpassuarni eqqaarsaatigaarput nunat issittoqarfiusut pillugit ilisimatusarnermi institutimit pilersitsinissaq. Frankrigip præsidentiata, Nicolas Sarkozyp pilersaarut tusaramiuk ingerluni pilersitsinissaq tapersersorlugu nalunaarpoq. Præsidentip suliniummut tapersiinera pissuteqarpoq, silap pissusaata allanngoriartornerata sukkavallaarneranik aammalu suliniutip soqutiginaateqarneranik. Taama oqarpoq Jean-Michel Huctin, Uummannami Jens Mikaelimik taagorneqartoq.

Ulluni makkunani Nuummiittut ilagaat professori Jan Borm, taanna Frankrigimi Arctic Institutimi nutaajusumi professoriusoq. Nuummi Ilisimatusarfimmi ilinniartunut paasisitsiniaavoq. Kalaallit ilisimatusarnissaminnut piumassuseqartut aammalu Frankrigimi ilisimatusarnissaminnut piukkoortut, bachelorgradimik imaluunniit ukiuni sisamani kingullerni ilinniartuusimanissaat piumasaqaataavoq. Sumulli tunngasumik ilinniagaqarnerat apeqqutaatinnagu periarfissinneqarput Frankrigimi Arctic Institutimi ilisimatusarnissaminnut.

Taakkuupput siunissami atorfissaqartinneqartut, professor Jan Bornm isumaqarpoq.

- Ukiuni makkunani nunat issittoqarfiusut nunarsuarmi tamanit alapernaanneqarput, silap allanngoriartornera pissutigalugu, aammali uuliasiulernissaq, aatsitassanik piiaaneq aammalu suliffissuaqarnikkut ineriartorneq eqqarsaatigalugit. Taama oqarpoq Jan Borm, nangillunilu:

- Nunani issittuni suliffissuarnik pilersitsisut ilarpassuisa, nunap inuii soqutigineq ajorpaat. Tamannalu allanngortittariaqarpoq. Ilisimatusarneq siuariartussaaq ikioqatigiikkaanni ilisimasanillu avitseqatigiikkaanni. Issittuni ilisimatusarneq avatagiisinut tunngaannanngilaq aammili inunnut tunngasuulluni.

Taama oqarpoq professor Jan Borm, Frankrigimi nunat issittoqarfiusut pillugit ilisimatusarnermi institutimi pilersitsisut ilaat.