Silap pissusaa pillugu ilisimatusarfiliortoqartariaqarpoq
Tamanna pillugu qitiusutut ilisimatusarfik silap pissusaata allanngoriartornerani ilungersuutigisassanik sammisaqartussaq pigisariaqarparput, Demokraatit isumaqarput. Isuma ajunngivippoq, Naalakkersuisut isumaqarput, kisiannili siuarsimareeqaagut.
Sermersuaq qanoq aassimatigaa?
Aamma sooq?
Demokraatit aalajangiissagaluarpata
silaannaq avatangiisillu pillugit qitiusutut ilisimatusarfiup suut suliarissanerai naatsuarannguamik taamatut oqaatigineqarsinnaapput.
Qitiusutut ilisimatusarfiup aammattaaq nunarsuup sinneranut siamasissumik oqaluttuartarnissaq isumagisussaavaa.
Partiip takorloorpaa qitiusutut ilisimatusarfiup taassuma Kalaallit Nunaat takussaanerulersissinnaagaa, ilisimatusarnermilu pingaarutilimmik inissisimalissalluni, taamatut allapput.
Naalakkersuisullumi tamatuminnga imaaliallaannaq tunuartitsilersaarunanngillat. Tommy Marø akissummini allappoq isumassarsiaq ajunngivissoq, Naalakkersuisulli arlalippassuarnik pilersaaruteqareersut.
Marøp tamatumani silaannaq pillugu isumasioqatigiittarfik kiisalu silaannaq pillugu ilisimatusarfik, Danmarkimi ilisimatusarnermut ministerip Helge Sanderip isumaa, assersuutigalugu eqqarsaatigaa.
Novemberip qaammataani suleqatigiissitap tamanna nalunaarusiussavaa.
Taamaalilluni pilersaaruterparujussuit pigineqareerput, taamaattumillu Tommy Marøp siunnersuutigalugu, Demokraatit isumassarsiaat pilersaarutaareersunut ilanngullugu suliarineqassasoq kiisalu tamakkua tamarmik Inatsisartut upernaakkut ataatsimiinnissaanni saqqummiunneqarumaartut.
