Silap pissusaa pillugu ilinniartoqarsinnaanngussaaq

Ajunaarnersuit amerliartuinnartut, silap pissusiata allanngornera pissutigalugu inuppassuit qimarrattut, nunarsuatsinni sermeq aakkiartuinnartoq. Tassa pisut tamakkorpassuupput - Københavnimilu Universiteti - Europami Universitetini siullersaalluni - ilinniartitseriaatsimik nutaamik aallartitsinialerpoq - tassa silap pissusiata allanngoriartornera pillugu kandidatinik ilinniartitsissamaalerami.
Allattoq Carla Davidsen
apriilip 02-at 2013 10:55

- Silap pissusiata allanngoriartornera tamatsinnut isumaqaraluttuinnarpoq, attuumassuteqaqalunilu. Taamaammat pingaaruteqarpoq silap pissusiata allanngoriartornerata nassatai malittaalu pillugit, unammillernartut ilinnniartitsissutigissallugit, Københavns Universitetimit Niels Elers Koch oqarpoq.

Ilinniartitsissutigineqartalersussamut ukiut marluk atorlugit kandidatinngortoqarsinnaassaaq, ilinniartullu Københavns Universitetimi atuarnertik naammassigunikku pinngortitamik ilisimatuutut, inooqatigiinnik ilisimatuutut, minnerunngitsumillu silap pissusaata allanngoriartornera pillugu ilisimasalittut imminnut taasinnaalissapput.

- Ilisimatusarneq, antropologi, inuiaqatigiit aningaasaqarniarnerat inuiaqatigiinnermillu ilisimatusaatit ilinniarnermi akuleriissapput. Nalunngilarpummi silap pissusiata allanngoriartornera pinngortitamut taamaallaat tunngasuteqanngitsoq, aammali uagutsinnut tunngassuteqarluinnarluni, Niels Elers Koch oqarpoq.

Ilinniarneq tuluttut ingerlanneqassaaq, ilinniartullu siulliit ukiaru septembarimi aallartippata ilinniartut 60-it inissaqartinneqassapput.