Silap pissusaa pillugu ataatsimeersuarput
Naalagaaffiit Peqatigiit silap pissusaa pillugu 13-issaannik ataatsimeersuartitsinerat Indonesiami qeqertami Balimi ingerlanneqartumi ippassaq ammaanersiorneqarmat Australia soqutigineqarluinnarpoq.
Australiamiut ministeriunertaavat Kevin Rudd Laborimeersoq ataatsimeersuarnermut peqataajartortut nikuikaallutik ersaartaappaat, tassa qinigaanermi kingornagut suliamini siullertut Kyotomi isumaqatigiissut 1997-imeersoq Australiamut atortussanngortillugu atsiorsimammagu.
Kyotomi isumaqatigiissummut Australia 2008-mi marsip naaneraniit tamakkiisumik peqataalissasoq, Kevin Rudd ilisimatitsivoq.
Taassuma neriorsuutigaa, Australiap Kyotomi isumaqatigiissummi anguniagaq ilungersuutiginiaraa, tassa CO2-mik silaannarmut aniatitsinerup 1990-imut sanilliullugu 8 procentimik appartinneqarnissaa, tamannalu 2012 nallertinnagu pissaaq.
Kevin Rudd-ip Kyotomi isumaqatigiissummik atsiuineratigut USA kiserliortunngortinneqarpoq. Tassami præsident George W. Buship USA isumaqatigiissummut 2001-imi ilaajunnaarsippaa. Taamalu USA massakkut nunani suliffissuaqarfiusuni CO2-mik aniatitsinerup millisarneqarnissaanut isumaqatigiissuteqartunut kisiartaalluni ilaajumanngitsutut inissillugu.