Silap pissusaa Natomit piareersimalluarfigineqarumavoq
- Avatangiisinut isumannaatsuunissamut Nato naleqqussartariaqarpoq, nunarsuullu kiatsikkaluttuinnarnera soorunami isumannaatsuunissamut tamakkiisumut sunniuteqarpoq, Fogh Rasmussen tusagassiortunik katersortitsinermi oqarpoq.
Siku aakkiartorpoq, Issittullu imartaani umiarsuit nutaamik aqqutissaqalissapput, tamaanilu aatsitassat iluaqutiginiarneqarsinnaanerat ajornannginnerulersussaavoq. Nunarsuup ilaani tamaani tamanna isumannaatsuunissamut soorunami sunniuteqartussaavoq, tamannalu eqqumaffigisariaqarparput, Anders Fogh Rasmussen oqarpoq.
Nunarsuup kiatsikkiartornerata kinguneranik Qalasersuup tikinneqarsinnaalernissaa, naalagaaffiit issittumut sineriallit, tassa Ruslandip, Canadap, Danmarkip, Norgip, aamma USA-p oqaloqatigiinnikkut nukittussutsiminnik misileraaffigereerpaat, tassami Qalasersuup imartaata naqqani annertuumik uuliaqarlunilu gasseqarnissaa naatsorsuutigineqarmat.
