Silap pissusaa inuutissarsiornermut sunniuteqarnersoq misissorniarpaa

Nunatta inuttai naleqqussarsinnaasut ilisimaneqareerpoq. Inuiaqatigiit pillugit ilisimatooq, Nordisk Ministerrådip ataani ilisimatusarfimmi Nordregionimeersoq Rasmus Ole Rasmussen, maanna ilisimatuussutsikkut misissuileruttorpoq, silap allanngoriartornera nunatsinnilu inuussutissarsiutit ineriartornerat imminnut toqqaannartumik attuumarnersut paasiniarlugu.
Allattoq Elisa Isaksen
juulip 08-at 2009 08:07

DMI, Kujaani Tunumilu ukiuni kingullerni 50-ini immap kissassusanik sikullu annertussusaanik nalunaarsuisimasoq, suleqatigalugu misissuineq ingerlanneqarpoq.

Paasissutissat DMI-meersut, paasissutissanik apersuinernillu, innuttaasut aningaasarsiornikkut inissisimanerannut tunngasunik imalinnik, ilaneqassapput.

- Silap allanngoriartornera inuussutissarsiutit ineriartornerannut sunniuteqartarpoq, kisianni politikkikkut aaqqiinerit annerujussuarmik malunniuttarput, Rasmus Ole Rasmussen atuagassiamut Polarfrontenimut oqarpoq.

- Aalisarneq eqqarsaatigigaanni, aalisakkanit aalajangersimasuniit aalisakkanut allanut nuuttoqartarpoq, aalisartut tunitsivissaqalernermikkut atortussarsiutissanilluunniit atorniarsinnaalernermikkut kaammattorneqartarlutik, Rasmus Ole Rasmussen oqarpoq.

Taassuma assersuutigalugu taavaa 1900-kkut aallartilaarneranni sila kiatsikkiartulermat, piniartuuneq qimakkiartuaarneqalersimasoq. Sineriak saarullinippoq ilutigisaanillu piniartutut inuuniarneq ajornarnerulerluni.

- Piniartut ullumikkut taamaallaat 50-it 100-llu akornanniipput, taakkualu sikunikkilliartortillugu ajornartorsiuleriartussapput, Rasmus Ole Rasmussen naliliivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq