Silap allanngornera pillugu isumasioqatigiissitsiniarput
Silap pissusaata allanngoriartorneranut nunatta periusissaa pillugu Namminersornerullutik Oqartussani Avatangiisinut Pinngortitamullu Pisortaqarfik, ukiaq manna oktobarip ulluisa 23-anni isumasioqatigiissitsisussanngorpoq.
Pisortaqarfiit suliffeqarfiillu, soorlu Pinngortitaleriffiup Nukissiorfiillu, suliamut peqataanissaat sulinermi aallaavigineqassaaq. Taakku saniatigut aamma allanik peqataasoqassaaq, inuussutissarsiutinik ingerlatsivinneersut, aalisarnermiit, piniarnermiit aamma nunalerinermeersut, kattuffiillu naalakkersuinermut attuumassuteqanngitsut soorlu KNAPK, SPSS aamma ICC peqataassapput.
- Silap pissusaata allanngoriartornera nunarsuarmioqatigiinnit oqallisaaqaaq, inuppassuillu nassuerutigaat Kalaallit Nunaat tassaasoq silap pissusaata allanngoriartorneranik erseqqinnerpaamik takunniffiusinnaasoq. Nunarput tassaalersimavoq amerlasoorpassuit isaannik uisitsisorlusooq, silap pissusaata allangoriartorneranut maannakkumut assortuisimasunut allaat. Arlalitsigut malugisimavarput, Nunarput ingammik Europami USA-milu qinikkanit annertuumik sunniuteqarsinnaasunit tikeraarneqartalersoq, Avatangiisinut Naalakkersuisoq Arkalo Abelsen allappoq.
