Silap allanngoriartornerata kingunerisaanik toqquteqartartut amerliartuinnavipput
Nunarsuatsinni silap allanngoriartornerata kingunerisaanik inuit nappaateqalerlutik ukiumut toqusartut amerliartuinnavipput, siorna 77.000-nngorsimallutik.
Naalagaaffiit Peqatigiit peqqinnissakkut suleqatigiiffia WHO taama naliliivoq.
- Annernartua maanna tikissimavarput, nunarsuup kissakkiartornerata inuunermut peqqissutsimullu sunniutai ajorluinnarput, iliuuseqanngikkuttalu ajorsiartuinnassallutik, Shigeru Omi, WHO-p nunat Manerassuup kangianiittut immikkoortortaqarfianni pisortaq oqarpoq.
Kiattup ippernai nappaatinik toqussutaasinnaasunik, soorlu malariamik, siaruarterisut nunani siornatigut takussaanngiffimminni takussaalersimapput, navianartorsiortitseqalutik.
Pingaartumik nunarsuup ilaani siallernikiffiulersuni nappaatit erngup mingutsinneqarneranit pisut, inunnik nappaalatitsinerulernissaat aamma aarleqqutaavoq, minnerunngitsumik imissaaleqinerup naatitsinermut sunniutaasa perlilernermik kinguneqartitsisarneri eqqarsaatigalugit.
WHO-p Malaysiami, piffissami matumani kiattup anorersuinik, kaavittuliornernik, qarsutsinernillu eqqugaaffiusumi ataatsimeersuartitsinera sapaatip-akunnera qaangiuppat aallartittussaq ullunik sisamanik sivisussuseqassaaq.
