Silap allanngoriartornera pillugu ataatsimeersuarnissaq pingaarnerpaassaaq

Silap allanngoriartornera pillugu Københavnimi decembarimi ataatsimeersuarnissaaq tassaavoq nunarsuatsinni ataatsimiittarnerit pingaarnersaat. Silap pissusaa pillugu ilisimatusartoq, tyskeq, Hans Schellnhuber, taama isumaqarpoq.
septembarip 29-at 2009 06:49

Københavnimi isumaqatigiinniarnermi nunat tamat isumaqatigiissusiorniassapput, gassit silaannarmik kissakkiartortitsisartut annikkilisarneqarnissaat silallu kiatsikkiartornerata unitsinniarneqarnissaa isumaqatigiissusiussallugu.

- Nunarsuatta aniguinissaa qulakkeerniartussaavarput, Schellnhuber, silap allanngoriartornerata kingunerisassai pillugit Potsdam-institutimi aqutsisuusoq, oqarpoq.

Pofessori taanna tyskiusoq siusinnerusukkut oqarnikuuvoq, silap pissusaata allanngoriartorneranut sanilliullugu russit "immeraataat kaavittoq" uppernarpasissuusoq.

Isumaqatigiinniarnissalli USA-p unitseriaannaassagai professorip ernummatigaa. Taanna isumaqarpoq silap pissusaata allanngoriartornera pillugu amerikamiut ilisimasaqanngippallaartut.

- Nunani tamani isumasiuinerit ersersippaat Brasiliami Kinamilu innuttaasut ajornartorsiutit amerikamiunut naleqqiullugit allaat paasisimasaqarfiginerugaat.