Silap allanngoriartornera ilisimatusaatigaat

Nuuk Basic-imik pilersitsinerup siunertaa tassaavoq ilisimatusaatigineqartartunit immikkoortunit sisamaasunit paasisat inerniliinerillu ataatsimoortumik katersorneqarnissaat, tamanillu atuarneqarsinnaanngorlugit nittartagassamut saqqummiunneqartussat.

Pinngortitaleriffiup, Asiaq, Københavnimi Universiteti, kiisalu Danmarkimi avatangiisit pillugit misissuisartut DMU, peqatigalugit, Nuup kujatinnguani Kangerluarsunnguup qinnguani ilisimatusarfissaq pilersinnialerpaat.

Nunarsuarmi silap allannngoriartornera peqqutigalugu nalunaarsuinerit paasissutissallu allat ilaatigut immamit, nunami naasartunit, nunap pissussaanit kiisalu silap qanoq inneranik pissutsit ilisimatusaatigineqarnerunissaat nunarsuarmi silap allanngoriartornera peqqutigalugu pisariaqartilerpaa.

Silap allanngoriartornera pillugu ilisimatusarneq ilisimatusaatillu tassaapput Nunani Avannarlerni Kulturi Ilinniartitaanerlu pillugit ataatsimiititaliaata soqutigisaannut ilaalluinnartut, ataatsimiititaliamillu ilaasortat Nuummiinnertik iluatsillugu Nuuk Basic takornariarpaat.

Norgemiup Dagfinn Sundsbø-p takusani tupigusuutigalugu oqaatigaa ilisimatusaatit taamaattut ataatsimiititaliamit eqqumaffigineqarlutillu assut pingaartinneqartut. Aammattaaq unnersiuutigaa ilisimatusartut suleqatigiilluarpasinnerat, nunaminunngooq angerlaruni unnersiutigisinnaasaminnik, sulinerminnilu iluaqutigisinnaasaminnik.

Finlandimiu Tommy Tabermann, tusagassiortuullunilu atuakkiortuusoq, oqarpoq, puigunngisaannagassaminik misigisaqarlunilu takusaqarsimalluni, naak Kalaallit Nunaata nillertorsuugaluartup kusanarnera puigukkiussimallugu. Kisiannigooq imaanngilaq atuakkiariniarlugu siunniussaqartoq.