Silap allanngoriartornera ammaanermi oqalugiartut qitiutippaat

Silap allanngoriartornerata issittup inuinut sunniutai ICC-mi ataatsimeersuarnerup ammarneqarnerani oqalugiartut arlallit pingaartillugit sammivaat.
Allattoq Jens Thorin
juunip 28-at 2010 12:31

Imaassinnaavoq, Københavnimi decembarimi COP15-eqarermat silap allanngoriartornera nunarsuarmiut sinnerisa puigoraat. Kisianni ICC-p Nuummi ataatsimeersuarnerani peqataasut puigunngilaat.

Iluliarsuit aatsitertut issittullu imartai mingutsinneqartut ataatsimeersuarnerup ammarneqarnerani oqalugiartut arlallit eqqarsaataanniipput.

- Issittup imartai nunarsuarmi minguinnerpaanut ilaapput, nunarsuarmioqatigiilli mingutsitsinerat uagutsinnut annguttarpoq. Arnat milutsitallit arnallu meerartaarusuttut nerisannaatsinnik nerisaqqunagit inanneqartarput. Tamanna akuerineqarsinnaanngilaq, Kommuneqarfik Sermersuumi borgmesteri Asii Chemnitz Narup oqarpoq.

Aamma USA-p sinniisaata Kerri-Ann Jones-ip, Ruslandip sinniisaata Alexey Rogovip, Danmarkimiit ambassadør Lars Møllerip kiisalu Canada-p sinniisaata Harold Fincklerip silap allanngoriartorneranik peqquteqartumik issittumi nunat unammiligaat sammivaat.

Aatsitassarsiorneq oqalugiartunit aamma uteqqianneqarpoq.

Nunatsinni naalakkersuisut Qeqertarsuup Kitaani uuliasiorluni qillerinissamut akuersissuteqaqqammerput. Taama aalajangerneq ICC-mit sakkortuumik isornartorsiorneqarpoq, aammalu Mexicop kangerliumarngani uuliamik mingutsitsisoqarnerata kingunerisaanik nunanit tamalaanit eqqumaffigineqalerluni.

Naalakkersuisut siulittaasuata Kuupik Kleistip oqalugiarnermini isornartorsiorneqarnissaq sioqqullugu oqaaseqarpoq:

- Uuliasiortitseqatigiiffiup qinnuteqarneraniit aalajangiinissatsinnut piffissaq sivisooq ingerlavoq, Kuupik Kleist oqarpoq.

Taassuma aamma oqaluttuaraa, Issittumi aatsitassarsiornermi piumasaqaatit minnerpaaffissaannik Danmark Nunarpullu maanna suliaqartoq.

ICC-mi sapaatit akunnerata uuma ingerlanerani ataatsimeersuarnermi silap pissusia qulequttanut sammisassanut sisamanut ilaavoq.