Silap allanngoriartornera akisussaqaaq
Silap allanngoriartornera inuiaqatigiinnut akisoqaaq, silallu allanngoriartornerata kingunerisaanik nunap ataqatigiinnermut attaveqarfii kalluarneqassapput.
Ilisimatooq Alaskameersoq isumaqarpoq aningaasat 18 milliardi koruunit attaveqarfiit iluarsartuunnissaannut ukiut tulliuttut 20-t ingerlanerini atorneqartariaqartut.
Nuna qeriuaannartoq aakkiartuinnassappat aqquserngit, eqqakkanullu aqqutit ajortikkiartuaassapput, imermullu ruujorit manngertornillutik atorsinnaajunnaariartuaassapput. Ilisimatooq Peter Larsen, University of Alaskameersoq, misissuereerluni taama inerniliivoq.
18 milliardi koruunit naammanngillat, saniatigummi aserfallatsaaliuinermut aamma aningaasartuuteqartoqartariaqarpoq.
Nunap attaveqarfii pitsaasuutinniarneqassappata aningaasat atugassat missingersuutinut maanna ilanngunneqareertariaqartut Peter Larsenip tv-qarfissuarmut CBC-mut oqaatigaa.
Attaveqarfiit pisortanit pigineqartut uani pineqarput, namminersortullu pigisaat pineqaratik.
Sipaarfiusinnaasunilli aamma nassaassaqartoq Peter Larsenip oqaatigaa, illut kiassarneqarnerat siunissami akikinnerulernissaat ilimagineqarmat.
