Silamiut pisortartaarput

decembarip 14-at 2004 10:58

Isiginnaartitsisartut Silamiut pisortartaarput.

Silamiut siulersuisuisa norskeq isiginnaartitsisartoq, ilitsersuisartoq, isiginnaartitsissusiortartorlu 56-nik ukiulik Svenn Syhrin pisortassatut toqqarpaat.

Svenn Syhrin 2003-p naalernerani Nuummut nuuttoq ukiuni arlalinni Norgep avannaani Tromsø-mi isiginnaartitsisartuni pisortaasimavoq, kalaallilli kulturianut tunngasut qanimut ilisimasaqarfigai.

Isiginnaartitsisartoqatigiit Silamiut ukiunik 20-nngortorsioqqammersut siulersuisui nutaamik aamma siulittaasoqalerput. Maannamut siulittaasuusimasoq Stig Lage, siulersuisuni ilaasortaaginnartoq taarserlugu Daniel Thorleifsen siulittaasunngorpoq.

Svenn Syrin-ip pisortanngornermini siullertut suliassarinerarpaa Silamiut aningaasaqarniarnerat atugassaqartitaanerisalu siunissami pitsanngorsaaviginissaa. Aamma neriuutiginerarpaa namminersorlutik inuussutissarsiutillit pisortanilu suliffeqarfiit suleqatiginissaat annertusarsinnaassallugu.

Isiginnaartitsissutissatut suliassaq Jappat Qaqqarmiu kalaalerpaluttunngorlugu isiginnaagassiarineqassaaq.