Silamiut isiginnaagassiaat nutaaq siullermeerlugu takutinneqartoq

Oqaluffiup nunatsinni inatsisitaarnerata ukiunik 100-inngorsiornera malunnartinniarlugu, isiginnaartitsisartoqatiigit Silamiut nutaamik ippassaq isiginnaartitsipput/tusarnaartitsipput.

Nuummi Hans Egede-p Oqaluffiani isiginnaartitsineq pivoq. Isiginnaariarsimapput inuit untritilinnit amerlanerusut, soorlu biskoppit nunanit avannarlerneersut arlallit aamma peqataasut.

Knud Rasmussen-ip allagaa ”Kuuniatoqqap oqaluttuaa” tunngavigalugu Makka Kleist Else Danielsenilu Silamiuneersut pissanganartuliaralugu isiginnaagassiarisimavaat.

”Kuuniatoqqap oqaluttuaa” tassaavoq, kristumiunngornerminik kristumiullu juullisiortarnerannik misigeqqaarnerminik, imaluunniit naapitseqqaarnerminik, angutip utoqqaap Knud Rasmussenimut oqaluttuaa.

Isiginnaartitsissut ippassaq takuteqqaarneqartoq Nuummi Annaassisitta Oqaluffiani sapaatiuppat juli-p ulluisa pingajuanni aamma takutinneqassaaq, nunatsinnili innuttaasut sinnerisa oqaluffimmi isiginnaartitsissut taanna juullip qaammataani aatsaat takusinnaajumaarpaat.

Makka Kleist Else Danielsenilu nunatsinni illoqarfinnut assigiinngitsunut decemberimi angalaassapput, tikiffimminni oqaluffinni tamani ”Kuuniatoqqap oqaluttuaa” takutittassallugu.