Silamik nalunaarutit qularnaallivissinnaanngillat

novembarip 08-at 2006 13:14

Tusarnaartartut arlallit silamik nalunaarutit DMI-p internetikkut saqqummiuttagai uparuartortuartarpaat, uniortarnerarlugit.

- Soorlu assersuutigalugu sapaatiummat anorsarissangatikkaluaraat angalaarpunga, qangaligami silagissuaq qatsunganeq, sumilluunnit avungarsuaq pujoqarnanilu anoreqanngilaq. Nuummi angallateeraatileqatigiinni angallatinik nakkutilliisoq Jan Brandt ippassaani taama oqarpoq.

Silamilli nalunaarut eqqortoq perusukkaanni ullormut unnuamullu tulliuttumut tunngasoq kisiat naatsorsuutigineqarsinnaasartoq, DMI-p erseqqissaatigaa.

- Ullut tulliuttut arlallit pineqassatillugit silamik nalunaarut 100 %-imik qularnaallivissinnaanngilaq, DMI-mi silasiortut pisortaat Søren Olufsen erseqqissaavoq, nangipporlu:

- Internetikkut ullormi siullermi saqqummiuttakkavut qularnaannerpaasarput, tassani oqartarpugut, 85 %-ii eqqortartut, ullunulli pingasunut tunngasut 65 %-ii eqqortarput, ullullu tallimat pineqartillugit 55 %-imut appartarluni. Søren Olufsen nassuiaavoq.

DMI silamik nalunaarutinik ullunut tallimanut atuuttussanik KNR-imut aamma nassiussisarpoq, taakkulu 5 procentpointimik pitsaanerusarput, silasiortumit suliarineqarsimasarmata, internetikkut saqqummiunneqartartut qarasaasiat kisimik suliarisarsimasarmatigik.

Søren Olufsen aamma oqarpoq, silamik nalunaarutit sumiiffinnut aalajangersimasuinnaq tunngasartut, taamaalillutillu allanngorarsinnaasartut.

Jan Brandtillu uparuagaa, tassalu sapaatiummat anorsarinnissaanik ilimasaaruteqartoqaraluartoq silagissimanera Søren Olufsenip akillugu oqarpoq, unnukkut anorsarissisimasoq.