Silami arsaannermi oqaluttuarisaanermut ilannguttumik kalaallit angusaqarput
Ajugaanerit marluk ataasiarlunilu ajorsarneq aqqusaareerlugit kalaallit silami arsaannermi nunanut allanut unammisartut Conifa Euro 2026-mi Italiami peqataanertik naammassivaat.
Tamanna bronzennassutaavoq unamminerlu Island Gamesimiit qaffasinnerusutut isigineqarpoq. Kalaallit Island Gamesip avataani aatsaavissuaq ujaminnapput.
- Maanna issiavunga kalaallit nunanut allanut unammisartut takutitaat assorsuaq tulluusimaarutigalugu, nuna tamakkerlugu sungiusaasoq Morten Rutkjær KNR-imut oqarpoq.
- Peqataaneq arsaattunut immikkuullarippoq aammali tamanna KAK-mut immikkuullarilluni. Unammersuarnermi angisuumi peqataasimalereerput tamannalu bronzemik pissarsissutigaat. Taamaattumik kalaallit arsaattartut sinnerlugit assorujussuaq nuannaarpunga, Morten Rutkjær oqarpoq.
Morten Rutkjær maajip qeqqani Nuummiitsiarpoq arsaattartut qasujaassutsikkut misilikkiartorlugit. Arsaattartut Italiamut tamatuma kinguninngua aallarput Udinesemi sungiusaatigalugu aallarniutigalugu arsarlutik.
Conifa Euro 2026 aallartimmat kalaallit Padania Italiap avannaaneersoq unammigamikku kalaallit 1-3-mik ajorsarput. Unamminermi tullermi Raetia Schweitzimeersoq kalaallit 4-1-mik ajugaaffigaat.
Unamminerit sakkortuut
Bronzennanniunnermi kalaallit unammisaat tassaapput Canton Ticino Schweitzimeersut unammiartortullu avannaarsuaneersut nuannaarutigeqisaannik kalaallit 3-2-mik ajugaapput. Unammineq timikkut eqqarsartaatsikkullu sakkortooq aqqusaareerlugu ajugaasoqarpoq.
Bronzennanniunnermi isertitat tamaasa uani takukkit.
- Nunat tamalaat unammineranni peqataaneq silarsuaq allarujussuuvoq. Tamaviaartoqartarpoq, naalleraattoqarlunilu suaartaaffigitittoqartarpoq. Eqqissisimaniaannartariaqartarpoq sunnertippallaarnaveersaarluni, Morten Rutkjær oqarpoq.
- Isumaqarpunga bronzennanniunnermi taama pisoqartoq unammisavut anisitaasortaqarmata uagut aqunniaannartussaagaluarlugu. Piniinnarnaveersaartoqartariaqarpoq. Ulapigata pisussaavugut. Tamanna iluatsipparput. Taamaattumik tamatuma aqqusaarnera aamma ilinniutaalluarpoq, Morten Rutkjær oqarpoq.
Nunatsinni aasaru pissartanngorniunneq Maniitsumi pilerpat tikissaaq nunanut allanut unammisartunut piukkunnartoqarnersoq misissuissalluni.
Pilersaarutit malillugit silami nunanut allanut unammisartut nunamut allamut oktobarimi unammiartussapput, siunissarlu ungasinnerusoq eqqarsaatigalugu aappaagu Savalimmiuni Island Gameseqarnissaa piareersarfigineqarpoq.
